राष्ट्रपतिको असंवैधानिक कदमविरुद्ध १४९ सांसद सर्वोच्च अदालत जाँदै

0
206

काठमाडौँ । प्रतिनिधि सभा विघटनविरुद्ध विपक्षी गठबन्धनका १४९ सांसदले सामूहिक रुपमा रिट दर्ता गराउने तयारी थालेका छन् । शुक्रबार मध्यरातमा संसद विघटन गराएपछि त्यसविरुद्ध आक्रामक रुपमा लागेको विपक्षी गठबन्धनका ती सांसदहरु सर्वोच्च अदालतमा रिट दायर गर्ने निर्णयमा पुगेका हुन् ।

आफूहरुले संसदबाट बहुमतको प्रधानमन्त्री चुन्ने स्पष्ट आधार दिँदादिँदै पनि प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले संसद विघटन गरेपछि यसको चर्को विरोध भइरहेको छ । उक्त निर्णय असंवैधानिक, अनैतिक भएको भन्दै संविधान र प्रणालीको रक्षार्थ उक्त गठबन्धनले सर्वोच्च जान लागेको हो ।

गठबन्धनका तर्फबाट शेरबहादुर देउवालाई प्रधानमन्त्री प्रस्ताव गर्दै शुक्रबार राष्ट्रपतिकै आह्वान बमोजिम गठबन्धनले १४९ सांसदको हस्ताक्षर बुझाइसकेका थिए । तर राष्ट्रपतिले भने प्रधानमन्त्री ओलीको चाहना बमोजिम रातारात संसद विघटन गरिदिएपछि यसले विपक्षी नेपाली कांग्रेस, माओवादी केन्द्र, एमालेको माधव नेपाल समूह, जसपाको उपेन्द्र–बाबुराम समूह र राष्ट्रिय जनमोर्चालाई आक्रोशित पारिदिएको छ । उनीहरुले त्यसविरुद्ध राजनीतिक र कानुनी लडाइँ लड्ने निर्णय गरिसकेका छन् ।

सर्वोच्चमा सबैको हस्ताक्षरसहित रिट हाल्नका लागि सबै सांसदलाई नागरिकतासहित उपस्थित हुन आह्वान गरिएको छ । त्यसले सर्वोच्च अदालतलाई दबाब पुग्ने उनीहरुको ठहर छ ।

LEAVE A REPLY

Please enter your comment!
Please enter your name here